دي مش مدينتي! ..

دي مش مدينتي !!

سرقة و نصب و تزوير و رشاوي.. وكأن الحكومة كانت مستنيه حد يرفع قضية على المشروع عشان يعرفوا إنه مخالف.. وكأن كل البنيان و الإعلان و كم المصاريف ده كان بدون تصاريح و بدون أوراق وتوقيعات من كل الجهات..

هي كانت سر ؟؟!
هو محدش كان شايف اليفط اللي تسد عين الشمس ؟؟

الأهم من كده .. ليه كل الحكومة ووزراء حكومتي يوقفوا الدنيا و ما يقعدوها عشان المشروع اللي اسمه (مدينتي)..

دي مش مدينتي!

انا مدينتي مدينة من مدن مصر.. بتعاني من التلوث و الزحام و تدني الخدمات..

انا مدينتي مدينة من مدن مصر مفيهاش مرافق محترمه .. و المصالح الحكومية فيها متهالكة . والكهربا بتقطع فيها كل شوية .. والمجاري ضاربة في الشوارع..والناس فيها بتاكل في بعض من الفقر و التعب و الفساد

هي دي مدينتي! ..

وجه الشبه بيني و بين اللي هيسكن في (مدينتي بتاعتهم) ..إني دفعت فلوس عشان اسكن (في مدينتي اللي زي مدن مصر)..

يبقى ليه الريس ميقفش عشان مدينتي ؟

ليه رئيس الوزراء ميوعدش بحل مشاكل مدينتي؟

ليه الدنيا متتحلش في كام يوم عشان مدينتي و مشاكل مدينتي؟

ولا عشان مدينتي مش زي (مدينتي) ؟..

ولا عشان الناس اللي حاجزة في (مدينتي) مش زي الناس الغلابة اللي ساكنه في مدينتي..

هي حكومتنا دي مش حكومتنا احنا برضو؟ مش موجودة لخدمتنا برضو ؟؟ .. مش احنا اللي -المفروض - انتخبناهم برضو ؟

بصو لمدننا زي ما بصيتو لـ (مدينتي)..

مش كل الناس معاها فلوس تسكن في (مدينتي).. مش 80 مليون مصري هيسكنوا في(مدينتي).. بس كل واحد نفسه مدينته يبقى فيها الحد الادنى للعيشة الكريمه ..

انا مدينتي تجيب اكتئاب .. ومع كده محدش راضي يوعدنا - ولو كده وكده- ان الوضع هيتحسن ..

لأن مدينتي مش املاك خاصة .. للأسف..

أرجوكم انظروا لباقي مدن مصر كما نظرتم (لمدينتي..)

زي ما عايزين تطمنوا الناس اللي حطوا ملايين في مشروع مدينتي.. طمنوا الناس اللي ضاع شقى عمرها والكام ألف جنيه اللي حيليتهم في بيت اتهد او مشروع اسكان محدود اتنصب عليهم فيه .. مهو الملايين بالنسبة لدول.. زي الكام ألف بالنسبة للناس التانيين ..

الحقوا مصر.. قبل ما الناس تقتنع فعلا ان الحكومة كلها وجدت عشان تحافظ على حقوق الكبار..

ساعتها الصغار هيدوروا على طريقه يحافظوا بيها على حقوقهم..

واكيد طريقتهم مش هتعجب حد .. و هتأذينا كلنا!