Friday 18 July 2008

انا ونفسي ... Tag from friends



اهلا وسهلا ..











بعد ان قامت العزيزة شيماء بتدبيسي تدبيسه محترمة في مدونتها نبضة قلب .. وحلفتني بالغالي لأرد :) .. يبقى لازم ارد ..





كان التاج هو .. اكتب عشرة اشياء عن نفسك ..





هحاول اكتب .. بس اللي هيتريق هيتضرب :P ..





1- انا شخصية مزاجية جدا جدا جدا جدا .. لأبعد الحدود .. بشهادة الجميع :D .. ممكن ابقى دلوقتي مبسوط .. بعد دقيقة تلاقيني قلبت .. بدون اي سبب .. على رأي واحد قالي انت طول ما انت قاعد بدور في دماغك على حاجة تضايقك .. واول ما تلاقيها تروح ماسك فيها و مضايق :) ..





2- يقولون اني طيب :) .. ويقولون اني خجول .. ويقولون اني (حبّاب ) . :) .. بس المهم ان الصفات دي على قد ما بتبسطني اني اسمعها .. على قد ما بتضايقني اما تيجي في حتة (ادي الشغل لأحمد هو طيب و مش هيقول حاجة .. ) .. ساعتها بكره الطيبه و اللي بيجي منها! .





3- مره صديق بيسألني , قولي معنى الحياة عندك في كلمة واحده .. قلت : القلق!! .. مشكلتي في حياتي القلق .. الخوف .. الترقب.. دوماً يقتلني القلق .. اتخوف من ان اخسر شيئا احبه او حلمت به واصبح في يدي .. دوماً قلق!! ..

4- اعترف ان السفر و العمل غيرتني .. ليس للأفضل على ما اظن ... كل اما اقرا بلوجات الناس اللي لسه في الكلية و ادخل على المنتدى و اشوفهم .. استغرب .. احس ان انا كنت كده! .. كنت! .. بس معرفش ايه اللي حصل! .. ليه مبقتش كده .. ليه مبقتش ببص للحياة كده .. يخرب بيت الروتين و الشغل و القلق اللي يخسر الواحد اجمل صفاته يا جدع! :)

5- اعشق حاجة اسمها شوكولاته :) .. وانا باكلها بحس ان شايف السيراتونين و هو بيتنطط فرحاً و زأططه :D ..

6- بعد 5 سنين دراسة في مصر وحدي دون أهلي .. و عودتي الآن لأعيش معهم .. اكتشفت اني اصبحت وغداً يعشق الوحده .. فقدت القدرة على التأقلم مع الاشخاص في المجتمع .. أصبحت اتمنى الوقت الذي اجلس فيه وحيدا ولو لبضع ساعات ..

7- المرأة بالنسبة لي هي الشاشة التي حين تنظر من خلالها تري كل الدنيا حولك بالألوان .. بعد ان كنت تراها ابيض و أسود :) ..

8- لما بضايق بدخل ارمي نفسي على سريري .. ادفن وشي في مخدتي .. واغمض عيني و احاول اكتم نفسي لثواني واحاول مفكرش في اي حاجة ... بحس اني بطلع طاقة سلبية في المخدة :) .. يمكن تخفف الطاقة السلبية الكتير اللي جوايا :( ..

9-انا متردددددددددد .. جدااااااااااااااا .. فوق ما تتصوروا :D

10 - عايز اتجوز بقى زهقت :( عايز واحده تطبطب عليا بقى :P

* * * * * * * * *

شكرا يا شيماء ع التدبيسه دي :Pمردودالك في الافراح ان شاء الله :D

Monday 30 June 2008

كان لي

كان لي في الأمس القريب .. أمنيه..
بيتٌ صغيرٌ ..
وامرأة ٌ حانيه ..

كان لي في الأمس القريب أحلاماً ..
ضاعت مع الألم !
ضاعت واقعاً ..
اكثر إيلاماً ..

كان لي في الأمس القريب ..
شيئا ً ..
ضاع لا أدري إلى أينَ ..
لا أدري ..!
فأنا لم أعد ..
أدري شيئا ..

Sunday 29 June 2008

امرأة من سكر




أحب أمرأة تعشقني ..

تتنفس انفاسي قبلي ..

وتفوح برائحة العنبر ..

وتعشق عيناي دوماً ..

وتذوب كذوبان السكر ..

أحب امرأة تفهمني ..

وتفكك عقدات حياتي ..

فهي حلم لا أكثر!

Thursday 26 June 2008

حبيبتي .. و الكرافات

:: حبيبتي .. و الكرافات ::

-----------------


نفسي اعيش طول عمري أغنيلك ..
و أشكيلك .. من الاحزان
و أحكيلك .. عن الاشجان
وتبقى دنيتي جنبك ..
جنان في جنان !!


* * *

وصبح جميل ..
غنا و مواويل ..
و حبيبتي قاعده بتسرّح
,في شعر طويل ..
* * *

تشوفني في بدلتي محتاس!
ومتأخر على معاد ناس ..
تقوم تربطلي( كرافاتي ) ..
بقمة رقة و بإحساس .
* * *

وأسرح جوه في عيونها ..
في لمس ايديها ..
في سكونها ..
ياستي بلاها دي ( كرافات ) !
بلاها الناس
بلاها حاجات!
* * *

في حد يسيب ملاك زيك
لوحده في وسط
خوف وسكات!
* * *

انا عايش معاكي اليوم
وهقطفلك سما و نجوم
نطير وحدينا ويا الحلم
ونغفى وننسي اي هموم

* * * * * * * * * *

Saturday 31 May 2008

Rachael & Dunikn! .. عالم جبانات!

Rachael & Dunikn! .. عالم جبانات!








لما كنت بتفرج ساعات على قناة mbc4 ... كان برنامج (ريتشيل راي) بيستدعي انتباهي .. بما انها مذيعة دمها خفيف و تلقائية و ملامحها مش (باردة) كملامح الامريكيين و انما فيها الكثير من ملامح الشرقيين ..





فوجئت اليوم بخبر منشور في العديد من المواقع عن دعاية ,عملتها (ريتشيل ) لشركة المقاهي و الدونتس المشهورة (دانكن دونتس) المنتشرة في كل انحاء العالم بما فيها بلادنا العربية .. وبصراحة لا انكر اني كنت بروح لدانكن دونتس ده كتيير لأنه فعلا كافيه كويس .

المشكلة ان (ريتشيل) كانت لابسه (كوفية) لونها ابيض و اسود , وهي الكوفية المشهورة في فلسطين ..
واكيد كما هو واضح مكانتش تقصد و انما اختارها الستايلست لأن الكوفية دي فعلا موضه عالمية من فتره في اوروبا ..
وفيه مجلات كتير من مجلات الموضع الاوروبية كانت حاطة موديلز عندهم وهم لابسين الكوفيه الفسلطينيه كصيحة للموضه السنة دي ..



وطبعاً بدأ - لوبي اللي ميتسموش- بحركته المضادة لهذه الدعاية , بدعوة انها تروج (للمتشددين ) في هذا العالم! .. وطبعا , شركة الدونتس المحترمة قامت بسحب الدعاية فوراً!!! ... و قدمت اعتذار رسمي بإنها لم تكن تقصد بالطبع ما حدث ,
بينما ذكرت بعض المواقع ان ريتشيل اعتذرت ... و فيه مواقع تانيه بتقول انها امتنعت عن التعليق..
أيا كان اللي عملته شركة دانكن دونتس .. او ريتشيل راي سواء اعتذرت او حتى معلقتش .. انا بعتبر ان التصرف ده قمة الجبن و قمة التخلف و قمة كبت الحرية! ..
يا بلاد بتتكلم عن الحرية و قارفينا بيها ليل نهار ... سحبتوا اعلان من التلفزيون ومن الانترنت و من الصحف .. لمجرد ان المذيعة لابسه كوفيه! ... والله ده قمة التخلف و قمة التناقض ! ..


بس هنعمل ايه بس .. طول ما لوبي اللي (مبيتسموش) كابس على نفس العالم كله .. هتفضل سياسة الكيل بمكيالين في كل حته .. هتفضل كل حاجة مباحة تحت ستار حرية الرأي .. ماعدا اي حاجة فيها نجمة سداسية ..

لكن الواضح ان كله ( لمّ نفسه ) ... و كله سحب الاعلان .. وقال دستور يا سيادنا!.. مكناش نقصد نزعلكم! ..

وسلملي على حرية الرأي!


اصل الخبر المنقول من :

http://gothamist.com/2008/05/28/rachael_ray_dun.php
The Boston Globe reports Dunkin' Donuts has yanked an online ad featuring Rachael Ray because of a scarf she wears in the spot.Some viewers noted that the silk scarf — which features a black-and-white paisley design (check it out here) — resembled a keffiyeh, a headdress usually worn by Arab men.At first, Dunkin' Donuts cast the complaints aside, but then Fox News commentator Michelle Malkin took matters one step further. In her syndicated column, Malkin claimed the keffiyeh symbolizes "murderous Palestinian jihad...popularized by Yasser Arafat and a regular adornment of Muslim terrorists."Dunkin' Donuts then quickly pulled the ad, saying, "Absolutely no symbolism was intended. However, given the possibility of misperception, we are no longer using the commercial." — J.R. Whalen

Thursday 29 May 2008

فين الـ Background music?!!


مين فينا مش فاكر احمد حلمي أما دخل المسرح عند نور في فيلم (ظرف طارق) .. وقالها (انا حلمت بيكي) ..و بدأت الموسيقى التصويرية تنساب بهدوء من الاوركسترا .. لتضفي على المشهد جمالاً و رقة و اثارة للمشاعر .


مين فينا مشافش احمد السقا وحنان ترك في (تيتو) اما قالها انه عايز يتجوزها .. ورجعت قالتله انا (فكرت ) .. وموافقة .. وبدأت موسيقى رقيقة مع الدموع التي ترقرقت في عينيهم من الفرحة ..


كل المشاهد بتخليني اقتنع بحاجة مهمه اوي .. اكيد حياتي هتبقى اجمل كتير لو كان فيها Background music او موسيقى تصويرية!


أحيانا ممكن تتحط في موقف مؤثر .. في كلام , وداع , عتاب , .. بتلاقي نفسك بتتخيل في اللحظة دي صوت الموسيقى بتداعب خيالك :) ..


في اوقات كتير اما بكون مضايق.. بنزل امشي في الشارع لوحدي .. وسط الزحمة و السيارات , واتخيل اني بصور مشهد سينيمائي لوحدي , وان فيه موسيقى شرقية مبهجة تنساب من كل الجوانب حولي ..


الحياة فعلاً كانت هتبقى اجمل لو كل موقف بنمر فيه بنسمع له موسيقى تصويرية ..

لكن لا مانع ان نشعر نحن بتلك الموسيقى في اذهاننا .. نشعر نحن بهذا الانسياب الرقيق لتلك الموسيقى العذبة في كل موقف .. سواء في العتاب و الغضب والوداع و الفرحة .. سنشعر عندها بشعور جديد مختلف .. !

Sunday 25 May 2008

أنختار ؟ .. أم نُختار؟

أنختار ؟ .. أم نُختار؟

آه ٍ من الدنيا ..

أسوأ ما يمكن ان تشعر به فجأة هو إحساس الضياع ! .. إحساسك انك الآن تعيش وسط غابة من الاختيارات و الاحتمالات .. لا تدري ايها صحيح و أيها خاطئ .. ايها ستختاره و أيها سيختارك! .. إحساس لا يوصف سوى بأنه قمة في القلق و الخوف و الترقب ..

أنحن نختار تلك الظروف ؟ ..

أم تلك الظروف هي التي تختارنا ! ..
لا أدري ..

ولا أظنني سادري قريباً .. ما اعلمه أني أشعر بين إصبعي الدنيا فوق طوفان من الخوف .. وفجأة سيلقى بي على هذا الشاطئ او ذاك .. فجأة سأجد نفسي - أخيراً - مستقراً , و عدت إلى المدار ..

عندها سأشعر بالاطمئنان ..

وحتى ذلك الحين .. اظنني سأصادق الخوف و القلق لبعض الوقت!

Friday 23 May 2008

الفنـــــــــــــــــــــون

منذ فترة طويلة ..
رحت مع صحابي إلى استاد طنطا , وتمشينا شوية ..
لفتت نظري كام حاجة قلت لازم اصورها! .. يمكن في ناس كتيير هتقولي ياااااه ما مصر كلها مناظر كده .. بس يا جماعة التناقض عجيب! والثقة اللي مخليه الناس سايبه اليافطة دي .. ع المكان ده .. ثقة غريبة! .. لا تصدر الا من اشخاص مرضي نفسيين .. انا لو صاحب المكان ده و معنديش فلوس و خلاص..شييييل اليافطة! ... سمي المكان ده اي حاجة غير مركز الفنون او شباب المستقبل! حرام بجد!
هسيبكم مع الصور






Thursday 22 May 2008

بتتقشر .. ولا بتتكسر ؟


انت ..
بتتقشر .. ولا بتتكسر ؟




من فترة قعدت افكر في الشخصيات اللي حوليا ..
وبصفتي شخص بحب اتفلسف :) , استنتجت حاجة مهمه جداً ... هشارككم فيها ..




الناس - يا إخواني - ينقسموا لقسمين ..
ناس بتتأشر ( من التقشير .. زي تقشير البرتقاله ده ) ..



وناس بتتكسر ( زي تكسير البيضة ده )




في ناس بنقابلهم في حياتنا , بيبقى من الصعب جداً اننا نفهمهم .. صعب نعرف تفكيرهم ووجهة نظهرهم , وأنا بعتبر نفسي من الشخصيات دي , لأني دايما بدي انطباع اول مش حلو اوي :) .. الناس بتقول عليا مش مرحب و منغلق .. يمكن عشان حدة الخجل عندي ممله شوية :) , بس عادة محدش بيقدر يفهمني غير بعد فترة ..




المهم , الشخصيات دي بتحس انك بتفهمهم كل يوم أكتر .. بتكتشف فيهم كل فتره ميزة .. و عيب .. ولكن كل فترة بتحس انك بتحترف التعامل معاهم اكتر :) ..
فيه ناس بتشوف ده عيب .. وناس بتشوفها ميزة ..





والناس اللي شايفه ده عيب .. بتحب النوع التاني.. النوع اللي بيتكسر. .




النوع اللي انت اول ما تشوفه و تكلمه .. خلال 5 دقايق تلاقي نفسك عرفت قصة حياته .. عرفت تفهمه .. عرفت تتعامل معاه! ..
النوع ده انا قابلته كتير.. نوع من الناس (العشرية) .. مجرد ما تقعد معاهم تحس انك اندمجت معاهم وعرفت كل حاجة عنهم .. بس دي محتاجة الشخصية تكون جريئة , منفتحة , وقادرة على الخوض في مختلف المواضيع مع مختلف الاشخاص ..




وبرضو في ناس بتشوف ده عيب .. وتشوف ده ميزة!



فكر كده و شوف نفسك .. انت بتتأشر.. ولا بتتكسر ؟؟

Wednesday 21 May 2008

البلد محتاجة ثورة يا رجالة!


البلد محتاجة ثورة يا رجالة!



فيه نكتة بتقول .. ان المستحيلات 16 .. وعدّد الراوي المستحيلات ال16 اللي كان من بينها ( مصري قاعد ساكت )

احنا شعب بنحب نتكلم و نحكي و ندردش.. ورانا ايه .. ورانا ايه ..خلونا نتكلم بصراحة .. هيجرا ايه اما نتكلم بصراحة ؟؟وضع البلد يا اخوانا بقى محتاج اننا نتكلم بصراحة ..

كل اما تقلب على قناة في التلفزيون .. تلاقي المذيع يقولك البلد محتاجة ثورة .. تفتح الجرايد .. تلاقي مكتوب البلد محتاجة ثورة .. ع النت .. تلاقي كل البلوجرز كاتبين ان مصر محتاجة ثورة ..


يا جماعة البلد بقالها 5 سنين محتاجة ثورة .. و مصر دي امك .. و أمي برضو .. انت لما أمك بتحتاج حاجة من البقال .. مش بتجري تجيبها ؟؟ او تبعت اخوك الصغير يجيبها ؟ .. وفي الاوساط الأعلى بتطلب ديليفري .. طب دلوقتي امك محتاجة ثورة - اللي هي مصر مش أمك مرات ابوك يعني - .. هتعمل ايه بقى يا حلو ؟؟
طبعا مش هتبعت اخوك الصغير ! ..ولا الديليفري ساعتها هيسد ..الثورة دي محتاجاك انت .. ايوه انت متبصش جنبك ..


خلونا نتكلم بصراحة .. محنا اتفقنا نتكلم بصراحة ..المفروض تنام النهاردة .. وانت ناوي تثور .. ابدأها النهاردة وانت على سريرك و مكلفت نفسك و دافس وشك في المخدة .. قول انا هثور بكره الصبح ان شاء الله .. ونام ..وبكره الصبح - ان شاء الله - , و انت بتشرب الشاي في الخمسينة و بتغمس فيه البسكوت ابو عجوة ..قول انا هثور ..مهو مش انت لوحدك اللي بتثور .. انا مش ببعتك متخافش.. ده كتير من الشعب بيثور ! ..
ما الضابط اللي نازل في عز الضهرية يعملك لجنة توقف العربيات اللي اصلا الزحمة موقفاها و يلم شوية رخص من الغلابة مهو ده عامل ثورة ..


والبنات اللي نازلين من صباحية ربنا و ضاربين الجينز و الاسترتش و البودي و الميك اب .. دول نازلين يعملو (ثورة) للغلابة اللي زيي و زيك - اه بص للي جنبك مش فارقة مهو متنيل زيك :) -
والمدرسين اللي مبيشرحوش و الطلبة اللي مبيزاكروش و الدكاترة اللي مبيكشفوش و الموظفين اللي مبيشتغلوش .. ما دول كلهم بيعملوا ثورة .. و عصيان مدني .. و حالة من الغلايان الذاتي بيطلعوها في برادات الشاي وبيغمسوا فيها البقسماط اخر النهار ..


يبقى احنا رجعنا لنقطتنا .. انك لازم تثور .. وهتبتدي بكره .. تنزل الصبح لا انت هتشتغل .. ولا هتعمل حاجة في يومك اللي مش باينله ملامح ده .. وتجر في شكل خلق الله .. و اللي يكلمك تقوله ايه ؟؟بعمل ثورة! .. عفارم عليك! ..
استأذنكم بقى عشان عندي شوية ثورة صغيرين هخلصهم و اجي ..
* * * *
خلاصة الكلام :
جاء لي زبون عجوز في الصيدلية النهاردة , وسأل عن دوا, و الدوا ده اتسحب من السوق لأن الشركة باعته لشركة تانيه و الشركة التانيه مخلصتش اجراءات التصنيع لسه .. المهم الزبون اما قلتله كده , قالي : ده الدوا الوحيد اللي كنت برتاح عليه .. يقوموا يشيلوه ! .. البلد دي عايزين يعملوا فينا ايه بس ! .. ردينا و قلنا : و لسه يا عم الحج لسه ..رد و قال: لسه ؟؟ .. انا خلاص هقابل وجه رب كريم .. الدور و الباقي عليكم انتم .. ده انتو هتشوفوا ايام سودا.. سودااا..
ومشي!
* * * *