بلادنا - بحق - غريبة
لماذا يعشق هذا الشعب ان يشعر بالإحباط , لماذا يعشق ان يتمسك بشئ ما بكل جوارحه , فلا يعتدل في فرحه ولا يعتدل في احباطه وليس طبعا في ثقته بالأشياء.
الشعب المصري لديه عشق غريب لأن يصعد بآماله صعودا صاروخيا دون اسس و دون سوابق , فينهار عندما يصطدم بواقعه الأليم و يهوى في وادي الاحباط السحيق
لماذا اذا هذا الصعود السريع ؟ لماذالا نعتدل في ثقتنا و تفاؤلنا ونبحث على ما يدعم تفاؤلنا ويحمي نجاحنا ونفكر دوما في خطط بديلة و خطط طارئة في حالة الفشل بدلا من ان ننشغل بفرط السعادة والاحلام..
* * *
تعمل ايه في شعب بيحب المرمطة .. بيحب يحبط و ينزل على فاشوش.ويقولك مفيش فايده و مش مكتوبلنا نفرح ..؟؟
الناس التي ثارت و تحدثت على البرادعي .. الآلاف الشباب يتكلمون و يؤيدون و يصورون .. كل برامج التلفزيون لا حديث لها سوى البرادعي .. الصحف و كتابها اما تؤيد البرادعي واما تأكل في لحمه ( راح البردعي و جه البرادعي و قال البرادعي و عمل البرادعي)
وتخرج برامج التوك شو المليئة بالظرفاء خفيفي الدم ..
بعضهم يحلل فيقول ( انا من رأي ان البرادعي غير محنك ) ماشي يا سيدي سيبنالكم الحنكة! هاتولنا واحد حنكة .. ورونا واحد كده باين عليه الحنكة ! هنعرف منين ان فلان ده محنك وده مش محنك ؟ هل المحنك مثلا بيبقى عنده مرض جلدي معين و اللي مش محنك بيكون بشرته صافيه ؟ نعرف المحنك منين ؟ من مشيته ؟ من بدلته ؟ من ضحكته ؟ قولولنا يا جماعة مدام انتم محنكين في معرفة المحنك من عدمه او خلونا نعمل مدرسة او جامعه تفرخ المحنكيين مدام معندناش محنكين كفاية. منظرنا ايه قدام العالم اما نقولهم ان احنا مش محنكين .. يرضيكم يعني يحكمكم واحد مش محنك .. والناس بقى تغمز من تحت لتحت كده سفي الغربة وتقولك لمصري اهو دول اللي حاكمهم واحد مش محنك ويضحكوا ..مبنفعش يا جماعة دي سمعتنا في وسط العالم .. اصل البلد اللي حاكمها مش محنك .. يبقى مفيهاش رجاله محنكين .. و الراجل مننا ولامؤاخذة ملوش الا دخلته على مراته وعياله بكليو برتقان ابوصرة وشوية حنكة تنفعهم في الايام السودة دي .. لو الست لقت جوزها داخل عليها في يوم كده وملقتش فيه حنكة .. هتسكت ؟؟ اكيد لأ .. و هتقلب الدنيا.. يعمل ايه ابوصرة من غير حنكه .. يسوى ايه الرااااجل من غير حنكته!
ناس تانية تقولك الراجل متمرمطش .. وكأن لازم الشخص اللي هيحكم البلد يكون بنطلونه مقطع و مناخيره سايبه و شبه العيال اللي نايمين تحت كبري اكتوبر .. ازاي ؟ عايزين اللي يحكم مصر مثلا يكون عايش في فقر و جاله التهاب كبدي و سرطان و عايش في عشوائيات و ومتعلم في المدارس المصرية العظيمة دي عشان يحكمكم كويس؟ طب بالذمة ده هيعرف يحكم بلد و يدير مؤسسات ويبقى عنده رؤية ؟ ده هيعرف يتكلم عن البلد بره و يرفع قدر الوطن ؟ عاجبكم الست عايشة عبد الهادي اللي الناس كلها قالتلك اهيييي الست من وسط العمال و علامها زيهم و بتفكر زيهم .. ونابهم ايه العمال غير المرمطة و قلة القيمة و عايز تصدرالستات المصريات يشتغلوا خدامات في الخليج .. هو ده الفكر ؟ هو ده التطور ؟ مهو ده الطبيعي يا جماعة اما تاخد واحد من وسط الناس اللي مش متعلمة و تقوله احكم ناس مش متعلمين .. يبقى انت كده بتدمرهم.. ومن الغباء ان يتقال ان عشان البرادعي عاش بره يبقى ميعرفش مشكلات مصر و مش حاسس بالناس .. مصر مش عايزه خريطة عشان تتفهم مشاكلها .. مصر مشاكلها زي مشاكل اي بلد متأخر .. فساد و سرقة و رشاوي و محسوبية و جهل و فقر و مرض.. حلها يا سيدي ياللي اتمرمطت ؟! تفهم في الخطط العبقرية ؟ تفهم في الاقتصاد و السياسة الداخلية و الخارجية و في الاديان و الثقافات و التعليم ؟ مهو لازم تفهم في كل ده عشان تبقى حاجكم ناجح .. لو متفهمش في ده مش هتعرف تختار اللي هيمسك المجالات دي تحتك ولو مش هتعرف تختار متحكمش! .. لا برادعي و لا غيره ..
